संस्थाको ३२औँ वार्षिक साधारण सभा महेश्वरी बैङ्क्वेट, थुसाँचामा सम्पन्न । १७ असोज, २०८२
१७ असोज, भक्तपुर ।
सिद्धि गणेश बचत तथा ऋण सहकारी संस्था लि.को ३२औँ वार्षिक साधारण सभा संस्थाका अध्यक्ष रुद्र नारायण लाखाको सभापतित्वमा महेश्वरी बैङ्क्वेट, थुसाँचामा सम्पन्न भयो ।
सभामा संस्थाका अध्यक्ष रुद्र नारायण लाखाले एकका लागि सबै, सबैका लागि एक भन्ने मूल नारालाई आत्मसात् गर्दै सदस्यहरूको आर्थिक, सामाजिक तथा सांस्कृतिक उन्नतिमा संस्था निरन्तर क्रियाशील रहेको उहाँले बताउनुभयो । उहाँले सदस्यहरूलाई आर्थिक रूपमा सक्षम र आत्मनिर्भर बनाउन संस्थाले सीपमूलक तालिमहरू सञ्चालन गर्दै आएको जानकारी गराइ यसले स्वरोजगारीका अवसरहरू सिर्जना गर्न मद्दत र्पुयाएको र आगामी दिनमा पनि यस्ता कार्यक्रमलाई प्राथमिकता दिइने बताउनुभयो । सञ्चालनका क्रममा सहकारी मूल्य, मान्यता, आर्थिक पारदर्शिता र इमानदारीलाई मुख्य मार्ग निर्देशकको रूपमा लिइएको अध्यक्षले स्पष्ट पार्नुहुँदै वर्तमान समयमा राष्ट्रिय सहकारी नियमन प्राधिकरणको स्थापना, नेपाल राष्ट्र बैंकको अनुगमन अधिकार तथा नियमनकारी निकायहरूबाट जारी निर्देशन, परिमार्जित ऐन, नियम र मापदण्डहरूको पूर्ण पालना गर्दै संस्था अगाडि बढि रहेको उहाँले उल्लेख गर्नुभयो । साथै, सम्पत्ति शुद्धीकरणसम्बन्धी निर्देशनको पालना, कार्यविधि तथा नीति संशोधन र सदस्यहरूलाई जोखिमको आधारमा वर्गीकरण गरी सम्बन्धित निकायमा आवश्यक विवरण तथा प्रतिवेदन पेस गरिएको जानकारी दिनुभयो । उहाँले समय र परिस्थिति अनुकूल सदस्यहरूलाई सहज सेवा प्रदान गर्न प्रविधिको प्रयोगलाई पनि जोड दिनुपर्ने बताउनुभयो ।
उहाँले केही संस्थाले सामाजिक उत्तरदायित्व बिर्सेर व्यक्तिगत नाफा कमाउने उद्देश्य राख्दा समग्र सहकारी क्षेत्रप्रति अविश्वास बढेको प्रति चिन्ता व्यक्त गर्नुहुँदै ऐन–नियम पालनामा कठिनाइ, बाझिएका निर्देशन र समयमा अनुगमन हुन नसक्दा असल अभ्यास गरिरहेका संस्थाहरूलाई हेर्ने दृष्टिकोणसमेत नकारात्मक बनेको उहाँले बताउनुभयो । उहाँले असल अभ्यास गरिरहेका संस्थाहरुको अध्ययन, अवलोकन गरी ऐन–नियमावलीमा परिमार्जनको आवश्यकता रहेकोमा जोड दिनुभयो ।
सभामा संस्थाका उपाध्यक्ष बिष्णु राम दुमरूले संस्था स्थापनाको ३१ वर्ष पार गरी एक पुस्ता पूरा गरेको बताउँदै हाल संस्थामा १७५१५ जना सदस्यहरू आबद्ध रहेको जानकारी दिनुभयो । उहाँले सहकारी क्षेत्रमा नियमनकारी निकायहरूबाट आइरहने निर्देशनहरू र विद्यमान चुनौतीहरूबारे चर्चा गर्नुहुँदै भक्तपुर नगरपालिका क्षेत्रभित्रका सहकारीहरूले सदस्यहरूको हित, उत्पादनमूलक कार्य, र आत्मनिर्भरताका लागि रचनात्मक भूमिका खेल्नुपर्नेमा जोड दिनुभयो । उहाँले सदस्यहरूको सुविधाका लागि संस्थाले सञ्चालन गर्दै आएको सिद्धि गणेश स्वास्थ्य क्लिनिक तथा अन्य सामाजिक सेवाहरूलाई आगामी दिनमा थप व्यवस्थित र प्रभावकारी बनाउँदै लैजानुपर्ने उहाँले बताउनुभयो । उपाध्यक्ष दुमरूले हाल सहकारी नीति नियमका कारण आदर निकेतन जस्ता सामाजिक कार्य गर्नबाट सहकारी संस्थालाई बञ्चित गरेको हुनाले ती कार्यहरु गर्न नीतिहरु संसोधन गर्दै जानुपर्ने बताउनुभयो ।
सभामा संस्थाका सचिव विष्णु प्रसाद दुमरूले आ.व. २०८२÷०८३ को प्रगति प्रतिवेदन प्रस्तुत गर्दै आगामी आ.व. २०८३÷०८४ का लागि प्रस्तावित कार्यक्रमहरूबारे चर्चा गर्नुभयो । उहाँले सहकारी क्षेत्रले भोग्नुपरेका विविध चुनौतीहरू, नीतिगत कडाइ तथा नियमनकारी निकायहरूबाट जारी निर्देशनहरूबारे चर्चा गर्नुहुँदै देशमा आएको भूकम्प, कोभिड महामारी, सिंहदरबार आगलागी, भदौ १० को हिमपहिरो तथा रसुवाको भोटेकोशी नदीमा आएको पहिरो र लेदोसहितको बाढीजस्ता प्राकृतिक तथा अन्य विपद्का बीचमा पनि संस्थाले आफ्ना सदस्यहरूलाई बिनासङ्कोच निरन्तर सेवा प्रदान गर्दै आएको बताउनुभयो । उहाँले विकृति र विसङ्गतिबारे बोल्दै उहाँले सहकारीको नीति, नियम, ऐन र विनियमभित्र रहेर सञ्चालित संस्थाहरूले सदस्यहरूको विश्वास कायम राख्न सफल भएको धारणा राख्नुभयो । सचिव दुमरूले व्यक्ति केन्द्रित चाहनाभन्दा संस्थागत नीति र नियमलाई प्राथमिकता दिएर नै सिद्धि गणेश सहकारीले आफ्नो पहिचान जोगाउन सफल भएको उल्लेख गर्नुभयो । उहाँले समय अनुसारको प्राविधिक व्यवस्थापन, संस्थागत सोच र व्यावहारिक परिमार्जन अहिलेको मुख्य आवश्यकता रहेको बताउँदै नयाँ सोच र विचार सहितको नेतृत्वले संस्थालाई थप उचाइमा पुर्याउने विश्वास व्यक्त गर्नुभयो ।
सभामा संस्थाका कोषाध्यक्ष जयराम गोर्खालीले सहकारी क्षेत्रमा देखा परेका वर्तमान चुनौतीहरूबारे चर्चा गर्नुहुँदै सहकारी नीति नियम पालना गर्दागर्दै पनि सञ्चालक समिति र कर्मचारीहरूको बदनीयत तथा संलग्नताका कारण धेरै सहकारीहरूमा विचलन आएको बताउनुभयो । उहाँले दलीय भागबण्डा, नियमनकारी निकायको अध्ययन अनुसन्धानको कमी र बजारको होडबाजीले गर्दा सहकारीहरू आफ्ना सदस्यहरूको आर्थिक, सामाजिक तथा सांस्कृतिक स्तर उन्नति गर्नबाट चुकिरहेको बिचार व्यक्त गर्नुभयो । कोषाध्यक्ष गोर्खालीले यस किसिमको नकारात्मक वातावरणका बिच सिद्धी गणेशजस्ता समुदायमा आधारित सहकारीमा पनि केही असर परेको उल्लेख गर्नुहुँदै सही र सबल सहकारीहरूले नियमनकारी निकायहरूसँग सहकार्य गरी अघि बढ्नुपर्नेमा जोड दिनुभयो । साथै, सहकारीहरूले सामाजिक सञ्जालको सही सदुपयोग गर्दै आफ्ना उत्कृष्ट अभ्यासहरूबारे सदस्यहरूलाई सुसूचित गराउनुपर्ने आवश्यकता औल्याउँनुभयो ।
कोषाध्यक्ष गोर्खालीद्वारा आ.व. २०८२÷०८३ को श्रोत तथा उपयोग तर्फ रु.३,३४,२७,०९,५५३।– (अक्षरेपी तीन अर्ब चौंतीस करोड सत्ताइस लाख नौ हजार पाँच सय त्रिपन्न रुपैयाँ) र आय तथा व्यय तर्फ रु.२२,२३,२१,२४५।–(अक्षरेपी बाइस करोड तेइस लाख एकाइस हजार दुई सय पैतालीस रुपैयाँ) को यथार्थ आर्थिक प्रगति प्रतिवेदन र आ.व. २०८३÷०८४ को श्रोत तथा उपयोग तर्फ रु.३,५५,००,००,०००।–
(अक्षरेपी तीन अर्ब पच्पन्न करोड रुपैयाँ) र आय तथा व्यय तर्फ रु.२०,५४,१६,०००।–(अक्षेरेपी बिस करोड चवन्न लाख सोह्र हजार रुपैयाँ) को अनुमानित बजेट तथा कार्यक्रमहरु पारित गरियो ।
सभामा संस्थाका लेखा सुपरिवेक्षण समिति संयोजक रामप्रसाद लाखाजुले २०५१ सालमा स्थापना भई उत्कृष्ट सेवा तथा संस्थागत सुशासनमार्फत स्थानीय, राष्ट्रिय तथा अन्तर्राष्ट्रिय स्तरको सम्मान हासिल गर्न सफल यस संस्थाको वित्तीय पारदर्शिता र सुशासन कायम राख्न प्रतिवेदन पेश गर्नुपर्ने जानकारी दिनुभयो । उहाँले सहकारी ऐन २०७४, नियमावली २०७५÷२०८३, विभागीय निर्देशिका, संस्थाको विनियम तथा कार्यविधिलाई आधार मानी वित्तीय कारोबारको स्वच्छता र पारदर्शिता कायम गर्ने समितिको उद्देश्य रहेको बताउनुभयो ।
सभा पश्चत संस्थाका अध्यक्ष रुद्र नारायण लाखाले हालको सञ्चालक समिति बिगठन गरी निर्वाचनको कार्यक्रमहरु अघि बढाउन निर्वाचन समितिका सदस्य मीन बहादुर बाटालाई जिम्मेवारी हस्तान्तरण गर्नु भएको थियो । निर्वाचन समितिका संयोजक कृष्ण गोविन्द खाइजुले निर्वाचनको अन्तिम नामावली घोषण गर्नुका साथै ४ वर्षे कार्यकालका लागि नव निर्वाचित सञ्चालक समिति र लेखा सुपरिवेक्षण समितिका सदस्यहरुलाई प्रमाण–पत्र वितरण र शपथ ग्रहण गराउनुभएको थियो । निर्वाचन समितिका सदस्य जीतेन्द्र मुनंकर्मीले निर्वाचन प्रकृया बारे संक्षिप्त जानकारी दिनुभएको थियो । साथै बिष्णु राम दुमरूको अध्यक्षतामा ९ सदसिय सञ्चालक समिति र ३ सदसिय लेखा सुपरिवेक्षण समितिको चयान भएको थियो । निर्वाचन कार्यक्रम निर्वाचन समितिका सदस्य मीन बहादुर बाटाले सञ्चालन गर्नु भएको थियो ।
